Атом өнеркәсібіндегі жаңалықтармен бөлісті
«Атакент» көрме орталығында энергетика саласындағы ең ірі шаралардың бірі – Powerexpo Almaty 2025 және Kazatomexpo 2025 халықаралық көрмесі өтті. Үш күнге созылған бұл маңызды жиынға әлемнің 15-тен астам елінен 190-нан аса компания қатысып, энергетика мен атом өнеркәсібіндегі соңғы жаңалықтарымен бөлісті.
Көрмеге қатысушылар қатарында Әл-Фараби атындағы Қазақ ұлттық университетінің физика-техникалық факультетінің түлектері де болды. Бүгінде олар еліміздің электр жүйелерін автоматтандырумен айналысатын «РЗА СИСТЕМЗ-КZ» компаниясында жұмыс істейді. Компания өкілдері көрме барысында өздерінің релелік қорғаныс және автоматика жүйелеріне арналған жаңа техникалық шешімдерін көпшілік назарына ұсынды. Жас мамандар заманауи құрылғылардың жұмыс істеу принципін көрсетіп, тәжірибелерімен бөлісті. Көрме қонақтарының қатарында физика-техникалық факультетінің «Электр энергетикасы» білім беру бағдарламасы бойынша 2-3 және 4-курс студенттері де болды. Олар іс-шараға факультеттің Плазма физикасы, нанотехнология және компьютерлік физика кафедрасы оқытушыларының жетекшілігімен келді. Көрме барысында «РЗА СИСТЕМЗ-КZ» мамандары студенттерге өз стендтерін таныстырып, нақты өндірістік үдерістер туралы айтып берді. Студенттер қашықтан басқарылатын жүйелердің жұмысын көріп, өз саласының болашағымен жақынырақ танысты.
«Біз университетте алған білімімізді нақты жобаларда іске асырып жатырмыз. Теория мен тәжірибені ұштастырудың маңызы зор. Көрмеге келген студенттер өндірістегі шынайы инженерлік шешімдерді көріп, мамандығына деген қызығушылығын арттырды», – дейді «РЗА СИСТЕМЗ-КZ» компаниясының өкілдері – ҚазҰУ түлектері. Мұндай іс-шаралар студенттер үшін кәсіби көзқарасын кеңейтуге үлкен мүмкіндік береді. Көрме барысында студенттер тек заманауи технологияларды көрумен шектелмей, сала мамандарымен еркін тілдесіп, өндірістің нақты талаптарын түсінді. Powerexpo Almaty 2025 және Kazatomexpo 2025 көрмелері биыл Қазақстанның энергетика саласындағы серпінді дамуын ғана емес, ғылым мен өндіріс арасындағы байланыс нығая түскенін көрсетті.
ҚазҰУ түлектері мен қазіргі студенттердің бір алаңда жүздесуі еліміздің инженерлік мектебінің өміршеңдігін дәлелдеген сәт болды.
Шолпан ӘБДИЕВА,
Әсем ӘМРЕНОВА,
ПФН және КФ кафедрасының аға оқытушылары